ਇਹ ਸਫ਼ਾ ਪ੍ਰਮਾਣਿਤ ਹੈ
ਮਜ਼ਹੱਬ (Religion)
ਮਜ਼ਹਬਾ! ਫੁਲ ਨਾ ਕੇ ਅਰਸ਼ੀ ਫੁੱਲ ਹੈਂ ਤੂੰ,
ਫੁੱਲਾਂ ਵਾਂਗ ਕੰਡੇ ਤੇਰੇ ਨਾਲ ਵੀ ਨੇ।
ਲੁਟੇ ਅਗਰ ਬੁਲੇ, ਚੜ੍ਹਕੇ ਅਰਸ਼ ਤੇ ਤੂੰ,
ਪੁਟੇ ਫਰਸ਼ ਉਤੇ ਥਾਂ ਥਾਂ ਖਾਲ ਵੀ ਨੇ।
ਉਡਨ ਲਈ ਇਨਸਾਨ ਨੂੰ ਪਰ ਦੇਕੇ,
ਫਾਹਨ ਲਈ ਉਸ ਦੇ ਲਾਏ ਜਾਲ ਵੀ ਨੇ।
ਰੁਤਬੇ ਬੜੇ ਜੇ ਤੇਰੇ ਉਪਾਸ਼ਕਾਂ ਦੇ,
ਤੇਰੇ ਆਸ਼ਕਾਂ ਦੇ ਮੰਦੇ ਹਾਲ ਵੀ ਨੇ।
ਟੁਟੇ ਦਿਲਾਂ ਤਾਈਂ ਕਿਤੇ ਜੋੜਿਆ ਈ,
ਸਾਬਤ ਦਿਲਾਂ ਤਾਈਂ ਕਿਤੇ ਭਨਿਆਂ ਈਂ।
ਜੇਕਰ ਕਿਸੇ ਤਾਈਂ ਅਸਲ ਨਜ਼ਰ ਬਖਸ਼ੀ,
ਕੀਤਾ ਕਿਸੇ ਤਾਈਂ ਅਸਲੋਂ ਅਨ੍ਹਿਆਂ ਈਂ।
੩੪
