ਇਹ ਸਫ਼ਾ ਪ੍ਰਮਾਣਿਤ ਹੈ
ਯਾਦਾਂ
ਇਸ ਪੀੜ ਅੰਦਰ ਸਵਾਦ ਹੈ।
ਦਿਲ ਉਝੜ ਕੇ ਵੀ ਸ਼ਾਦ ਹੈ।
ਰਾਤਾਂ ਜਗਾਂਦੀ ਯਾਦ ਹੈ।
ਤਾਰੇ ਗਿਨਾਂਦੀ ਯਾਦ ਹੈ।
ਯਾਦ ਆਸਰੇ ਹਾਂ ਜੀਂਂਵਦਾ।
ਘੁਟ ਸਬਰ ਦੇ ਹਾਂ ਪੀਂਵਦਾ।
ਦੁਨੀਆਂ ਜਦੋਂ ਸੌਂ ਜਾਂਵਦੀ।
ਕੁਦਰਤ ਹੈ ਪਲਕਾਂ ਲਾਂਵਦੀ।
ਉਸ ਵੇਲੇ ਉਠਦਾ ਜਾਗ ਮੈਂ।
ਲਾਂ ਬਾਲ ਯਾਦ ਚਰਾਗ ਮੈਂ।
ਦੁਨੀਆਂ ਵਸਾਂਵਾਂ ਯਾਦ ਦੀ।
ਰਚਨਾ ਰਚਾਵਾਂ ਯਾਦ ਦੀ।
ਮਨ ਨੂੰ ਟਿਕਾਂਦੀ ਯਾਦ ਹੈ।
ਤਨ ਨੂੰ ਭੁਲਾਂਦੀ ਯਾਦ ਹੈ।
ਅੱਖਾਂ ਮਿਟਾ ਦੇਂਦੀ ਹੈ ਏਹ।
ਮਜਲਾਂ ਮੁਕਾ ਦੇਂਦੀ ਹੈ ਏਹ।
ਅਰਸ਼ੀ ਚੜ੍ਹਾ ਦੇਂਦੀ ਹੈ ਏਹ।
ਵਿਛੜੇ ਮਿਲਾ ਦੇਂਦੀ ਹੈ ਏਹ।
੬
