ਇਹ ਸਫ਼ਾ ਪ੍ਰਮਾਣਿਤ ਹੈ
ਹੋਇਆ ਹਜ਼ਮ ਨਾ ਤੁਸਾਂ ਦੀ ਅਣਖ ਕੋਲੋਂ,
ਤੁਸੀਂ ਆਪ ਉਗਲੱਛ ਕੇ ਕੱਢਿਆ ਏ ।
ਡੂੰਘੇ ਖੂਹ ਅੰਦਰ ਸ਼ਰਮ ਸੁੱਟ ਦਿਤੀ,
ਮੁੜ ਆਏ ਬੇ-ਸ਼ਰਮੀ ਨੂੰ ਭਾਗ ਲਾ ਕੇ ।
ਤੁਸੀਂ ਜੀਣਾ ਬੇ-ਅਣਖੀ ਦਾ ਚਾਹੁੰਦੇ ਓ !
ਕਲਗੀ ਵਾਲੇ ਦੇ ਅੰਮ੍ਰਤ ਨੂੰ ਦਾਗ ਲਾ ਕੇ ।
ਸੀਨੇ ਪਾਟ ਗਏ ਮਾਵਾਂ ਦੇ ਪੁਤਰਾਂ ਦੇ,
ਤੀਰ ਬੋਲੀਆਂ ਕਾਲਜੇ ਚੀਰ ਗਈਆਂ ।
ਬੱਜਰ ਸੀਨਿਆਂ ਦੀ ਕਰੜੀ ਖੱਲ ਤਾਂਈਂ,
ਕੈਂਚੀ ਵਾਂਗ ਕਰਕੇ ਲੀਰ ਲੀਰ ਗਈਆਂ ।
ਕਲਗੀ ਵਾਲੇ ਦੇ ਨਾਮ ਤੇ ਬਖ਼ਸ਼ ਦੇਵੋ,
ਲਗੇ ਕਹਿਣ ਦੁਹਾਈਆਂ ਪਾਂਵਦੇ ਹਾਂ |
ਖਾਣਾ ਪੀਣਾ ਹੈ ਹੁਣ ਹਰਾਮ ਸਾਨੂੰ,
ਅਸੀਂ ਭੁਖਿਆਂ ਜੰਗ ਨੂੰ ਜਾਂਵਦੇ ਹਾਂ ।
ਅੰਤ ਚਾਲੀ ਦੇ ਚਾਲੀ ਹੀ ਸਿੰਘ ਸੂਰੇ,
ਤੇਗ਼ਾਂ ਚੁਕ ਕੇ ਫੇਰ ਤਿਆਰ ਹੋਏ ।
ਭਾਗਾਂ ਭਰੀ ਉਸ 'ਭਾਗੋ' ਨੂੰ ਨਾਲ ਲੈਕੇ,
ਟੁਰੇ ਜੰਗ ਲਈ ਲਾਲ ਅੰਗਾਰ ਹੋਏ ।
ਜਿਧਰ ਪਏ ਉਹ ਸਫ਼ਾਂ ਨੂੰ ਸਾਫ਼ ਕਰ ਗਏ,
ਜਿਧਰ ਲੱਥੇ ਉਹ ਲਾਹ ਗਏ ਘਾਣ ਲੱਖਾਂ ।
ਜਿਧਰ ਮੁੜੇ ਤੇ ਫੌਜਾਂ ਦੇ ਮੂੰਹ ਮੋੜੇ,
ਖਿਦੋ ਵਾਂਗਰਾਂ ਸੀਸ ਉਡਾਣ ਲੱਖਾਂ ।
- ੪੮ -
