ਪੰਨਾ:ਬੋਲੀਆਂ ਦਾ ਪਾਵਾਂ ਬੰਗਲਾ - ਸੁਖਦੇਵ ਮਾਦਪੁਰੀ.pdf/182

ਇਹ ਸਫ਼ਾ ਪ੍ਰਮਾਣਿਤ ਹੈ

ਜੀਜਾ ਕਹਿੰਦਾ ਸੁਣ ਨੀ ਸਾਲ਼ੀ
ਤੇਰੇ ਪਿੱਛੇ ਮਰਦਾ
ਤੇਰੇ ਪਿੱਛੇ ਛੱਡਤਾ ਵੈਰਨੇ
ਕੰਮ ਧੰਦਾ ਸਭ ਘਰ ਦਾ
ਤੂੰ ਤਾਂ ਮੇਰੀ ਛੋਟੀ ਸਾਲ਼ੀ
ਵੇਖੇ ਬਾਝ ਨੀ ਸਰਦਾ
ਕੱਚੀਆਂ ਕੈਲਾਂ ਨੂੰ-
ਜੀਅ ਸਭਨਾ ਦਾ ਕਰਦਾ

ਸਾਲ਼ੀ ਕਹਿੰਦੀ ਸੁਣ ਵੇ ਜੀਜਾ

ਇਹ ਕੀ ਮੈਨੂੰ ਕਹਿੰਦਾ
ਜਾਹ ਵਗ ਜਾ ਤੂੰ ਪਿੰਡ ਆਵਦੇ
ਹਿੱਕ ਕਾਸ ਨੂੰ ਦਹਿੰਦਾ
ਬੋਤਲ ਪੁੱਟ ਕੇ ਪੀਨੈਂ ਦਾਰੂ
ਰੋਜ਼ ਸ਼ਰਾਬੀ ਰਹਿੰਦਾ
ਨਾਰ ਬਗਾਨੀ ਦੇ-
ਬੋਲ ਮੂਰਖਾ ਸਹਿੰਦਾ

ਸਾਕ ਸਾਕ ਨਾ ਕਰਿਆ ਕਰ ਵੇ

ਕੀ ਸਾਕ ਤੋਂ ਲੈਣਾ
ਹੁਣ ਤਾਂ ਤੈਨੂੰ ਜੀਜਾ ਕਹਿੰਦੀ
ਫੇਰ ਕਹੂੰ ਟੁੱਟ ਪੈਣਾ
ਇਹਨਾਂ ਸਾਕਾਂ ਤੋਂ -
ਤੂੰ ਕੀ ਜੀਜਾ ਲੈਣਾ

ਸਾਕ ਸਾਕ ਨਾ ਕਰਿਆ ਕਰ ਵੇ

ਵੇ ਕੀ ਸਾਕ ਤੋਂ ਲੈਣਾ
ਪਹਿਲਾਂ ਸਾਲ਼ੀ ਸੂਟ ਭਾਲੂਗੀ
ਫੇਰ ਭਾਲੂਗੀ ਗਹਿਣਾ
ਝਿੜਕਿਆ ਸਾਲ਼ੀ ਦਾ-
ਕੁਝ ਨੀ ਬੇ ਸ਼ਰਮਾ ਰਹਿਣਾ

180 - ਬੋਲੀਆਂ ਦਾ ਪਾਵਾਂ ਬੰਗਲਾ