ਇਸ ਸਫ਼ੇ ਦੀ ਪਰੂਫ਼ਰੀਡਿੰਗ ਕੀਤੀ ਗਈ ਹੈ
( ੨੧੨ )
ਜਿੱਥੇ ਸਰਕਾਰ ਆਪਣਾ ਸਾਰਾ ਰੁਪਿਆ ਪੈਸਾ ਤੇ ਕੀਮਤੀ ਮਾਲ ਜਮ੍ਹਾਂ ਰੱਖਦੀ ਏ ।
ਸੁਕਰਾਤ:-ਤਾਂ ਫੇਰ ਮੇਰੀ ਜਾਚੇ ਤੁਹਾਡੇ ਪਿੰਡ ਵਿੱਚ ਵੀ ਤਾਂ ਸਾਰਿਆਂ ਕੋਲ ਖਜਾਨੇ ਹੈਨ ਨੇ।
ਜਮਾਦਾਰ:-ਸੁਕਰਾਤ ਜੀ, ਇਸ ਤੋਂ ਤੁਹਾਡਾ ਕੀ ਮਤਲਬ ਏ ? ਅਸੀ ਬੜੇ ਗਰੀਬ ਆਂ, ਸਾਡੇ ਕੋਲ ਖਜਾਨੇ ਕਿੱਥੋਂ?
ਸੁਕਰਾਤ:-ਜਮਾਦਾਰ ਜੀ, ਤੁਸੀ ਹੁਣ ਤਾਂ ਇੱਕ ਟੋਆ ਪਟਿਆ ਹੋਣਾ ਏ ।
ਜਮਾਦਾਰ:-ਆਹੋ ਜੀ, ਜਰੁਰ ਪੱਟਿਆ ਏ, ਪਰ ਓਹ ਤੁਹਾਡੇ ਆਖੇ ਵੇਖੇ ਈ ਪੱਟਿਆ ਏ ।
ਸੁਕਰਾਤ:-ਤੁਸੀ ਆਪਣਾ ਸਾਰਾ ਗੰਦ ਤੇ ਕੂੜਾ ਉਸੇ ਵਿੱਚ ਈ ਸੱਟਦੇ ਓ ?
ਜਮਾਦਾਰ:-ਹਾਂ ਜੀ ।
ਸੁਕਰਾਤ:-ਘਰ ਦਾ ਕੂੜਾ ਤੇ ਸੁਆਹ ਵੀ ?
ਜਮਾਦਾਰ:-ਹਾਂ ਜੀ ।
ਸੁਕਰਾਤ:-ਪਿੰਡ ਦੇ ਉਦਾਲੇ ਬਰਸਾਤ ਨੂੰ ਜੋ ਘਾ ਬੂਟ ਉੱਗ ਆਉਂਦਾ ਏ ਓਹ ਵੀ ਵੱਢਕੇ ਸਾਰਾ ਉਸ ਵਿੱਚ ਈ ਸੱਟਦੇ ਹੋਵੋਗੇ ?
ਜਮਾਦਾਰ:-ਜੀ ਹਾਂ ।
