ਇਸ ਸਫ਼ੇ ਦੀ ਪਰੂਫ਼ਰੀਡਿੰਗ ਕੀਤੀ ਗਈ ਹੈ
( ੨੦੦ )
ਦਾਤਰੀ ਨਾਲ ਕਰਦੇ ਓ, ਜੇਹੜੀ ਇੱਕ ਦੰਦਾਂ ਦੀ ਛਿੰਗ ਤੋਂ ਕੋਈ ਐਨੀ ਵੱਡੀ ਨਹੀਂ ਹੁੰਦੀ ਤੇ ਏ ਤਰ੍ਹਾਂ ਆਪਣਾ ਸਮਾਂ ਤੇ ਮੇਹਨਤ ਐਵੇਂ ਗੁਆਂਦੇ ਓ ।
ਜ਼ਿਮੀਂਦਾਰ:-ਸਾਡੀ ਦਾਤਰੀ ਕੋਈ, ਐਡਾ ਵੱਡਾ ਹਥਿਆਰ ਤਾਂ ਨਹੀਂ ।
ਸੁਕਰਾਤ:-ਤੁਸੀ ਨੂਹ ਦੇ ਵੇਲੇ ਦੇ ਪੁਰਾਣੇ ਹਲਾ ਨਾਲ ਆਪਣੀ ਜ਼ਮੀਨ ਵਾਹੁੰਦੇ ਓ । ਜਦ ਤੁਹਾਨੂੰ ਚੰਗੀ ਤਰ੍ਹਾਂ ਪਤਾ ਏ ਕਿ ਗੁੜਗਾਵੇਂ ਹਲ ਦੀ ਇੱਕ ਸੀ ਤੁਹਾਡੇ ਲਕੜੀ ਦੇ ਹੱਲ ਦੀਆਂ ਚਾਰ ਸੀਆਂ ਦੇ ਬਰੋਬਰ ਏ ।
ਜ਼ਿਮੀਂਦਾਰ:-ਸੁਕਰਾਤ ਜੀ, ਇਹ ਗੱਲ ਬਿਲਕੁਲ ਸੱਚੀ ਏ ।
ਸੁਕਰਾਤ:-ਕੀ ਇਸ ਨਾਲ ਬਹੁਤ ਮੇਹਨਤ ਤੇ ਸਮਾਂ ਐਵੇਂ ਨਹੀਂ ਜਾਂਦਾ ?
ਜ਼ਿਮੀਂਦਾਰ-ਆਹੋ ਜੀ, ਐਵੇਂ ਜਾਂਦਾ ਏ ।
ਸੁਕਰਾਤ:-ਤੁਸੀ ਆਪਣਾ ਰੁਪਿਆ ਗਹਿਣਿਆਂ ਤੇ ਲਾ ਦੇਂਦੇ ਓ, ਓਹਨਾਂ ਦੀ ਘੜਾਈ ਤੇ ਰੁਪਿਆ ਗੁਆਂਦੇ ਓ ।
ਜ਼ਿਮੀਂਦਾਰ:-ਜੀ ਹਾਂ, ਅਸੀਂ ਆਪਣਾ ਰੁਪਿਆ ਟੂਮਾਂ ਤੇ ਗੁਆ ਦੇਂਦੇ ਹਾਂ ।