ਇਸ ਸਫ਼ੇ ਦੀ ਪਰੂਫ਼ਰੀਡਿੰਗ ਕੀਤੀ ਗਈ ਹੈ
ਕੱਲਪ ਬ੍ਰਿਛ ਏ ਜਿਸ ਦੀ ਛਾਂ ਹੇਠਾਂ,
ਕਿਸੇ ਹੋਰ ਥਾਂ ਜਾਣ ਦੀ ਲੋੜ ਹੈ ਨਹੀਂ ।
ਕਾਮਧੇਨ ਏ ਜਿਸ ਦੇ ਸੇਵਿਆਂ ਹੀ,
ਕਿਸੇ ਗਲ ਸੰਦੀ ਰਹਿੰਦੀ ਥੋੜ ਹੈ ਨਹੀਂ।
ਇਹਦੇ ਲੜ ਲਗਿਆਂ ਬੇੜਾ ਪਾਰ ਹੁੰਦਾ,
ਇਸ ਦੇ ਦਰ ਢਠਿਆਂ ਹੌਲਾ ਭਾਰ ਹੁੰਦਾ ।
ਇਸ ਦੇ ਦਰਸ਼ਨਾਂ ਨਾਲ ਛੁਟਕਾਰ ਹੋਵੇ,
ਸੜਦਾ ਕਾਲਜਾ ਹੈ ਠੰਢਾ ਠਾਰ ਹੁੰਦਾ ।
ਸਿਖਿਆ ਏਸ ਦੀ ਧਾਰ ਕੇ ਚਲੇ ਜੇ ਕਰ,
ਪੰਜਾਂ ਰਾਖਸ਼ਾਂ ਦਾ ਨਹੀਓਂ ਵਾਰ ਹੁੰਦਾ।
ਸਿਖ ਏਸ ਦਾ ਫੁਲ ਦੇ ਵਾਂਗ ਖਿੜਦਾ,
ਜਿਸ ਦੇ ਨਾਲ ਨਾ ਕਦੀ ਵੀ ਖਾਰ ਹੁੰਦਾ ।
ਰਾਜੇ ਮਹਾਰਾਜੇ ਤੇ ਸ਼ਹਿਨਸ਼ਾਹ ਏਸ ਦਰ ਤੇ,
ਲਿਫ ਜਾਂਵਦੇ ਹੈਨ ਕਮਾਨ ਵਾਂਗੂੰ।
ਮਥੇ ਲਾਂਵਦੇ ਤਿਲਕ ਨੇ ਧੂੜ ਦਾ ਜੋ,
ਸਦਾ ਚਕਮਦੇ ਹੈਨ ਓਹ ਭਾਨ ਵਾਂਗੂੰ ।
ਇਨਸਾਨ ਪੈਦਾ ਕਰ
ਐ ਦਸਮੇਸ਼ ਦੇ ਸਿੱਖਾ,
ਨਵੀਂ ਉਹ ਜਾਨ ਪੈਦਾ ਕਰ ।
ਨਵੀਂ ਧਰਤੀ ਬਣਾ ਆਪਣੀ,
ਨਵਾਂ ਆਸਮਾਨ ਪੈਦਾ ਕਰ ।
-੨੮-