ਪੰਨਾ:ਕੇਸਰ ਕਿਆਰੀ.pdf/42

ਇਸ ਸਫ਼ੇ ਦੀ ਪਰੂਫ਼ਰੀਡਿੰਗ ਕੀਤੀ ਗਈ ਹੈ

ਮੰਦਰਾਂ ਤੇ ਮਸੀਤਾਂ ਵਿਚ,
ਚਰਚਾ ਤਾਂ ਬੜਾ ਸੁਣਿਆ,
ਮਿਲਿਆ ਨ ਕੋਈ ਭੇਤੀ,
ਜੋ ਮੇਲ ਭੀ ਕਰਾ ਦੇ ।
ਤਰਸੇਵਾਂ ਰਿਹਾ ਬਣਿਆ,
ਰਲ ਮਿਲ ਕੇ ਕਿਤੇ ਬਹਿੰਦੇ,
ਯੂਸੁਫ ਨੂੰ ਸੁਣਾ ਸਕਦੇ,
ਅਰਮਾਨ ਜ਼ਲੀਖਾਂ ਦੇ ।
ਜੀ ਸੜ ਗਿਆ ਹੁਣ ਬਾਵਾ !
ਛਡ ਖਾਬ ਖਿਆਲੀ ਨੂੰ,
ਬੀਮਾਰ ਨੂੰ ਤੜਫਣ ਦੇ,
ਬੂਹੇ ਤੇ ਮਸੀਹਾ ਦੇ ।
ਇਸ ਲਾਰੇ ਲਪਾਰੇ ਦਾ,
ਇਤਬਾਰ ਰਿਹਾ ਜਾਂਦਾ,
ਜੋ ਦੇਣਾ ਦਿਵਾਣਾ ਈ,
ਉਹ ਖੋਲ੍ਹ ਕੇ ਸਮਝਾ ਦੇ ।
ਉਹ ਨਰਕ ਬਿਸ਼ਕ ਹੋਵੇ,
ਪਰ ਫੇਰ ਨ ਬਦਲਾਵੀਂ,
ਜਿਸ ਥਾਂ ਤੇ ਬਿਠਾਣਾ ਈ,
ਇਕ ਵਾਰ ਹੀ ਬਿਠਲਾ ਦੇ ।

-੧੧-