ਇਸ ਸਫ਼ੇ ਦੀ ਪਰੂਫ਼ਰੀਡਿੰਗ ਕੀਤੀ ਗਈ ਹੈ
੧੦੪. ਨਿਗਹ ਦਾ ਤੀਰ.
(ਗ਼ਜ਼ਲ)
ਛਾਨਣੀ ਕੀਤਾ ਕਲੇਜਾ,
ਕਿਸ ਨਿਗਹ ਦੇ ਤੀਰ ਨੇ ?
ਖੋਹ ਲਿਆ ਜਿਗਰਾ, ਕਿਦ੍ਹੀ-
ਭੋਲੀ ਜਿਹੀ ਤਸਵੀਰ ਨੇ ?
ਜੋਗੀਆ ! ਸੂਰਤ ਵਟਾ ਕੇ,
ਕਿਉਂ ਭੁਲਾਵੇ ਦੇ ਰਿਹੋਂ ?
ਤਾੜ ਲੀਤਾ ਤੋਰ ਤੋਂ,
ਰਾਂਝਣ ਰੰਗੀਲਾ ਹੀਰ ਨੇ ।
ਨਾ ਬੁਲਾ, ਨਾ ਬੋਲ,
ਨਾ ਪੜਦਾ ਹਟਾ, ਨਾ ਝਾਤ ਪਾ,
ਬੇ ਅਸਰ ਕਦ ਤਕ ਰਹਿਣਗੇ-
ਮੇਰੇ ਹਾੜੇ ਕੀਰਨੇ ।
ਸਹੁੰ ਕਰਾ ਲੈ, ਹੋਰ ਕੋਈ-
ਏਸ ਘਰ ਆਇਆ ਨਹੀਂ,
ਤੇਰੇ ਹੱਥਾਂ ਦੇ ਘੜੇ ਹੋਏ,
ਏਹ ਸਭ ਜ਼ੰਜੀਰ ਨੇਂ ।
ਚਾਰਾਗਰ ਕਹਿੰਦਾ ਹੈ :
ਪੀ ਕੇ ਬੇਖ਼ੁਦੀ ਦੀ ਲੇਟ ਜਾ ।
ਪਰ ਕਿਆਮਤ ਤਕ ਅਸਰ-
ਕਰਨਾ ਹੈ ਇਸ ਅਕਸੀਰ ਨੇ ।
-੧੭੭-
