ਇਹ ਸਫ਼ਾ ਪ੍ਰਮਾਣਿਤ ਹੈ
ਮੇਰਾ ਪਿਆਰਾ ਦੇਸ਼ ਤੇ ਮੇਰਾ ਫ਼ਰਜ਼
ਜਿਵੇਂ ਦੇਸ਼ ਇੰਗਲੈਂਡ ਦੇ ਵਾਸੀਆਂ ਨੂੰ,
ਦਿਲੋਂ ਲਗਦਾ ਏ ਇੰਗਲਸਤਾਨ ਚੰਗਾ।
ਚੀਨ ਜਿਸ ਤਰਾਂ ਭਾਂਵਦਾ ਚੀਨੀਆਂ ਨੂੰ,
ਤੇ ਈਰਾਨੀਆਂ ਨੂੰ ਹੈ ਈਰਾਨ ਚੰਗਾ।
ਜੇਕਰ ਪੁੱਛੀਏ ਕਦੀ ਜਾਪਾਨੀਆਂ ਨੂੰ,
ਇਹੋ ਕਹਿਣਗੇ: 'ਸਾਡਾ ਜਾਪਾਨ ਚੰਗਾ।
ਤਿਵੇਂ ਸਾਨੂੰ ਵੀ ਸਮਝਣਾ ਚਾਹੀਦਾ ਏ,
ਦੇਸ਼ਾਂ ਸਾਰਿਆਂ 'ਚੋਂ ਹਿੰਦੁਸਤਾਨ ਚੰਗਾ।
ਜੰਮੇ, ਪਲੇ, ਖੇਡੇ, ਇਸ ਦੀ ਗੋਦ ਅੰਦਰ,
ਸਾਡਾ ਫ਼ਰਜ਼ ਹੈ ਇਸ ਤੇ ਮਾਣ ਕਰੀਏ।
ਹੋਈਏ ਚੌਖੰਨੇ ਵਤਨ ਦੇ ਨਾਮ ਉਤੋਂ,
ਇਸ ਦੀ ਚੌਗੁਣੀ ਜਗ ਤੇ ਸ਼ਾਨ ਕਰੀਏ।
ਸਾਡਾ ਫ਼ਰਜ਼ ਹੈ ਆਪਣਾ ਸਮਝ ਕੇ ਤੇ,
ਅਪਣੇ ਦੇਸ਼ ਦੇ ਨਾਲ ਪਿਆਰ ਕਰੀਏ।
ਭਲਾ ਦੇਸ਼ ਦਾ ਰੱਖ ਕੇ ਮੁਖ ਅਗੇ,
ਦੇਸ਼ ਸੇਵਾ ਦਾ ਸਾਰੇ ਪਰਚਾਰ ਕਰੀਏ।
ਬਾਹਰ ਕੱਢ ਬੁਰਾਈਆਂ ਸਾਰੀਆਂ ਨੂੰ,
ਰੀਤਾਂ ਭੈੜੀਆਂ ਸੰਦਾ ਸੁਧਾਰ ਕਰੀਏ।
੬੫
