ਇਹ ਸਫ਼ਾ ਪ੍ਰਮਾਣਿਤ ਹੈ
ਮੂਰਖ ਸਮਝਦੇ ਨਹੀਂ ਬੇਫਿਕਰ ਹੋ ਕੇ,
ਤੇਲ ਪੰਥ ਦੀਆਂ ਜੜ੍ਹਾਂ 'ਚ ਚੋ ਰਹੇ ਨੇ।
ਕਲੀ ਤੂੰ ਏਧਰ ਤੇਰੀ ਜਾਨ ਉਤੇ,
ਪੈਂਦੀ ਪਈ ਬਲਾ ਕ੍ਰੋੜ ਦਿਸਦੀ।
ਢਾਹ ਸਿਖੀ ਨੂੰ ਲਗ ਰਹੀ ਚਵ੍ਹੀ ਪਾਸੀਂ,
ਤੈਨੂੰ ਨਹੀਂ ਪਰਚਾਰ ਦੀ ਲੋੜ ਦਿਸਦੀ।
ਢਿਲੀ ਕੌਮ ਜੋ ਹੋਏ ਪਰਚਾਰ ਵਲੋਂ,
ਕਦੀ ਜਗ ਤੇ ਫੁਲਦੀ ਫਲਦੀ ਨਹੀਂ।
ਮਿਟ ਜਾਂਵਦਾ ਨਾਮ ਨਿਸ਼ਾਨ ਉਸ ਦਾ,
ਜਿਹੜੀ ਧਰਮ, ਸਚਾਈ ਤੇ ਚਲਦੀ ਨਹੀਂ।
ਕੌਮ ਆਲਸੀ ਪੈਂਡਿਓ ਪਛੜ ਜਾਂਦੀ,
ਅਗੇ ਲੰਘੀਆਂ ਕੌਮਾਂ ਨੂੰ ਰਲਦੀ ਨਹੀਂ।
ਮੁਰਦਾ ਹੋ ਜਾਂਦੀ ਦੂਜੀ ਕੌਮ ਅਗੇ,
ਦਾਲ ਓਸ ਦੀ ਰਤੀ ਵੀ ਗਲਦੀ ਨਹੀਂ।
ਕੌਮ ਹੋਰਨਾਂ ਦੀ ਵੇਖ ਜਗ ਅੰਦਰ,
ਜ਼ਿਦੋ ਜ਼ਿਦ ਲਗੀ ਘੋੜ ਦੌੜ ਦਿਸਦੀ।
ਖ਼ਬਰੇ ਕੀ ਹੋਇਆ ਅੱਖਾਂ ਤੇਰੀਆਂ ਨੂੰ,
ਤੈਨੂੰ ਨਹੀਂ ਪਰਚਾਰ ਦੀ ਲੋੜ ਦਿਸਦੀ।
੫੫
