ਆਕਾਸ਼ ਉਡਾਰੀ/ਖੜ ਖੜ ਛੱਡੋ ਹੁਣ
ਖੜ ਖੜ ਛੱਡੋ ਹੁਣ
ਕਿਸੇ ਤਾਂਈਂ ਖ਼ਤ ਅਤੇ ਕਿਸੇ ਨੂੰ ਲਫ਼ਾਫ਼ਾ ਆਇਆ,
ਖੜ ਖੜ ਕਰਦੀ ਇਕ 'ਤਾਰੇ' ਨੂੰ ਵੀ ਤਾਰ ਆਈ।
ਥਰ ਥਰ ਦਿਲ ਕੰਬੇ, ਖ਼ੈਰ ਹੋਵੇ ਸਈ, ਰੱਬਾ,
ਕਿਨੂੰ ਕਿਨੂੰ ਡੋਬ ਖ਼ਬਰੇ ਕਿਨੂੰ ਕਿਨੂੰ ਤਾਰ ਆਈ।
ਖਵਰੇ ਕਿਸੇ ਲਾਟਰੀ ਦਾ ਲਿਖਿਆ ਨਤੀਜਾ ਹੋਸੀ,
ਜਿਤ ਕੇ ਲਿਆਈ ਕੁਝ ਯਾ ਇਹ ਕੁਝ ਹਾਰ ਆਈ।
ਬੰਬੇ ਮੇਲ ਉਤੇ ਖਵਰੇ ਆਉਣਾ ਪਿਆਰੇ ਕਿਸੇ,
ਯਾ ਇਹ ਕਿਸੇ ਸੱਜਣ ਨੂੰ ਕਰ ਕੇ ਬੀਮਾਰ ਆਈ।
ਡਕੋ-ਡੋਲੇ ਖਾਵੇ ਦਿਲ, ਹਾਏ ਖਬਰੇ ਲਿਖਿਆ ਕੀ,
ਕੀ ਕੁਝ ਤਾਰ ਅੱਜ ਕਰ ਕੇ ਹੈ ਕਾਰ ਆਈ।
ਪੱਟ ਕੇ ਜਾਂ ਪੜ੍ਹੀ ਲਿਖੀ ਹੋਈ ਸੀ ਵਧਾਈ ਵਿਚ,
ਸਾਰਿਆਂ ਨੂੰ ਕਹਿ ਦਿਓ ਬਸੰਤ ਦੀ ਬਹਾਰ ਆਈ।
ਸੂਹੇ ਸੂਹੇ, ਸਾਵੇ ਸਾਵੇ, ਨੀਲੇ ਨੀਲੇ, ਪੀਲੇ ਪੀਲੇ,
ਰੰਗ ਰੰਗੇ ਸੂਟ ਪਾ ਕੇ ਵਿਚ ਸੰਸਾਰ ਆਈ।
ਚਿੱਟੀ ਚਿੱਟੀ ਧੁੱਪ ਨੂੰ ਸੀ ਆਪਣੇ ਲਿਆਈ ਨਾਲ,
ਖ਼ਬਰੇ ਕਿਹੜੀ ਗੁਠ ਵਿਚ ਪਾਲੇ ਨੂੰ ਖਲ੍ਹਾਰ ਆਈ।
ਬਾਗਾਂ, ਫੁਲਵਾੜੀਆਂ, ਤੇ ਖੇਤੀਆਂ ਤੇ ਵਾੜੀਆਂ 'ਚੋਂ,
ਜਿਥੋਂ ਜਿਥੋਂ ਲੰਘੀ ਓਥੇ ਵਾਸ਼ਨਾ ਖਿਲਾਰ ਆਈ।
ਬਿਰਛਾਂ ਤੇ ਬੂਟਿਆਂ ਦੀ ਟਹਿਣੀਆਂ ਤੇ ਟੀਸੀਆਂ ਨੂੰ,
ਨਵੀਆਂ ਪਰੂੰਬਲਾਂ ਦੇ ਨਾਲ ਇਹ ਸ਼ਿੰਗਾਰ ਆਈ।
ਕੱਟ ਕੱਟ ਗਲਾਂ 'ਚੋਂ ਗੁਲਾਮੀ ਵਾਲੇ ਬੰਧਨਾਂ ਨੂੰ,
ਪੰਛੀਆਂ ਨੂੰ ਪਾਣ ਇਹ ਆਜ਼ਾਦੀ ਵਾਲੇ ਹਾਰ ਆਈ।
ਖੁਲ੍ਹ ਦਿਆਂ ਭੌਰਿਆਂ ਨੂੰ ਦੇ ਦਿਓ ਸੁਨੇਹਾ ਕੋਈ,
ਫਟਾ ਫਟ ਕਰਦੀ ਬਸੰਤ ਦੀ ਬਹਾਰ ਆਈ।
ਝੜਾਂ ਵਿਚ ਲੁਕ ਕੇ ਹੈ ਵੜ ਗਈ ਪੱਤ-ਝੜ,
ਸੁਣਿਆਂ ਬਸੰਤ ਜਦੋਂ ਸਣੇ ਪਰਵਾਰ ਆਈ।
ਖ਼ਿਜ਼ਾਂ ਦਾ ਜ਼ਮਾਨਾ ਗਿਆ ਨਾ ਹੋਇਆ ਘਰਾਂ ਵੱਲ,
ਬਾਗਾਂ ਵਿਚ ਜਦੋਂ ਫੂਲ ਰਾਣੀ ਸਰਕਾਰ ਆਈ।
ਕੱਢ ਦਿਓ ਪਿੰਜਰੇ 'ਚੋਂ ਬੁਲਬਲਾਂ ਬੇਦੋਸੀਆਂ ਨੂੰ,
ਇਹੋ ਗੱਲ ਆਖ ਕੇ ਸੱਯਾਦ ਨੂੰ ਵੰਗਾਰ ਆਈ।
ਮੁਰਦਿਆਂ ਦਿਲਾਂ ਵਿਚ ਨਵੀਂ ਜਾਨ ਪਾਣ ਆਈ।
ਜ਼ਿੰਦਾ ਦਿਲਾਂ ਵਾਲਿਆਂ ਦੇ ਕਰਨ ਦੀਦਾਰ ਆਈ।
ਪਿਪਲਾਂ ਦੇ ਪਤਰਾਂ ਪੁਰਾਣਿਆਂ ਨੂੰ ਆਖ ਛੱਡੋ,
ਖੜ ਅੜ ਛਡੋ ਹੁਣ ਨਵਿਆਂ ਦੀ ਵਾਰ ਆਈ।
ਨਵਿਆਂ ਜਵਾਨਾਂ ਹੁਣ ਨਵੇਂ ਨਵੇਂ ਕੰਮ ਸਾਂਭੇ,
ਨਵੇਂ ਰੰਗਾਂ ਨਾਲ ਜੇ ਬਸੰਤ ਦੀ ਬਹਾਰ ਆਈ।